Россия Ташқи ишлар вазирлиги Руминиянинг Москвадаги элчихонасидаги мудофаа масалалари бўйича атташени ва унинг ўринбосарини мамлакатдан чиқариб юбормоқда. Руминиянинг вақтинча ишлар вакили Лилиана Бурду Россия ТИВга чақирилиб, унга тегишли нота топширилди.
Россия Ташқи ишлар вазирлигининг маълум қилишича, руминиялик дипломатларнинг чиқариб юборилиши Бухарестдаги Россия элчихонасининг икки ходими — ҳарбий атташе Виктор Маковский ва унинг ўринбосари Евгений Игнатевнинг “персона нон грата” деб эълон қилинишига “симметрик жавоб” бўлди.
Руминия томони бу дипломатларнинг фаолияти 1961 йилги Дипломатик муносабатлар тўғрисидаги Вена конвенцияси қоидаларига мос келмаганини билдирган. Одатда бундай ибора элчихона ходимлари жосусликда гумон қилинаётган ҳолларда қўлланилади.
