Россия 7 июлга қадар Украинага янги оммавий зарба бериши мумкин

Зеленский Россия 7 июлга қадар Украинага янги оммавий зарба беришга тайёргарлик кўраётганидан огоҳлантирди.

Украина президенти бу ҳақда разведка маълумотларига таяниб, ўзининг кечки видеомурожаатида маълум қилди.

"Россияликлар янги оммавий зарбага тайёргарлик кўраётгани ҳақида разведка маълумотлари келиб тушмоқда. Бу Путинга хос услуб. Ушбу зарбалар Қўшма Штатларнинг Мустақиллик кунидан кейин ва Анқарадаги NATO саммити олдидан юз бериши эҳтимоли юқори", — деди у.

Зеленский украиналиклардан эҳтиёткорроқ бўлишни ва ҳаво ҳужуми тревогаси сигналларини эътиборсиз қолдирмасликни сўради. Шунингдек, у ғарблик иттифоқчиларини Patriot ҳаво ҳужумидан мудофаа тизимлари учун ракеталар етказиб беришни тезлаштиришга чақирди.

АҚШ Мустақиллиги куни 4 июл куни нишонланди. Анқарадаги NATO саммити 7–8 июл кунлари бўлиб ўтади.