ХХ асрнинг бошида AҚШда болангизни бемалол почта орқали жўнатишингиз мумкин бўлган ва бу учун ҳеч ким сизни ёмон ота-она деб ҳисобламаган. Болангизни бувисиникига жўнатмоқчимисиз? Маркани ёпиштиринг ва болани почтачига беринг.
ХIХ асрда AҚШ почта хизматида Ёввойи Ғарб қонунлари ҳукмронлик қилган. Обрўли шахслар ўз почта хизматини йўлга қўйган. Улардан ортда қолишни истамаган давлат почта хизмати 1913 йилда катта посилкаларни ҳам бутун мамлакат бўйлаб, арзон етказиб беришини маълум қилади. Бундай имкониятни қўлдан бой беришни истамаган, баъзи америкаликлар болаларини ҳам почта орқали жўнатишни бошлайди. Ўша пайтда почта хизмати поезд чиптасидан арзон бўлган ва почтачилар ҳам одамлар орасида катта хурматга эга бўлган. 1913 йилдаёқ болаларни посилка қилиб жўнатиш ҳолатлари қайд этилган. Қишлоқ почтачиси Вернон О. Литл вазни 10 фунт (1 фунт - 0,453592 кг) бўлган болани бувисиникига етказиб берган. Энг машҳур бундай ҳолатлардан бири 1914 йил 19 февралда юз берган. Aйдахо штатида 4 ёшли Шарлотта Мей Пирсторфни 73 мил (117.48 км) масофага почта орқали жўнатишган. "Посилка" поездда жўнатилган ва уни бобо ва бувиси кутиб олган.
1915 йилга келиб почта хизмати ниҳоят бундай ҳолатларга эътибор қаратишни бошлайди ва болаларни почта орқали жўнатишни таъқиқлайди.
