Пентагон Германияни НАТОда қайта қуролланишга намуна деб атади

АҚШ Пентагони Германиянинг мудофаа харажатларини кескин ошираётганини ижобий баҳолаб, уни НАТОдаги бошқа иттифоқчилар учун намуна сифатида келтирди.

АҚШ мудофаа вазирининг сиёсий масалалар бўйича ўринбосари Элбриж Колби Сенатда Германия янги НАТО мажбуриятларини бажариш учун ишончли қадамлар қўяётганини айтди. Берлин 2035 йилга белгиланган муддатни кутмасдан, 2029 йилга келиб мудофаа ва хавфсизликка ялпи ички маҳсулотнинг 5 фоизини йўналтиришни режалаштирмоқда.

НАТО давлатлари мудофаага ЯИМнинг камида 3,5 фоизини тўғридан-тўғри сарфлаш, яна 1,5 фоизгача маблағни хавфсизлик инфратузилмаси, киберҳимоя ва бошқа шу каби йўналишларга ажратиш бўйича келишган.

Колби август ойида ҳам Германиядаги сўнгги бир ярим йилдаги ўзгаришларни жуда катта бурилиш сифатида баҳолаган эди.

Пентагон, шунингдек, Германия ва АҚШ ўртасидаги мудофаа саноати соҳасидаги ҳамкорлик кенгайиб бораётганини таъкидлади. Сентябрь ойида Германия мудофаа вазири Борис Писториус ва АҚШ мудофаа вазири Пит Хегсет қурол-яроғларни биргаликда ишлаб чиқиш ва ишлаб чиқариш, лицензия асосида ишлаб чиқариш ҳамда ҳарбий техникани таъмирлашни кенгайтириш бўйича ниятлар баёнотини имзолаган.