Мигрантларнинг Россияда бўлиш қоидалари кучайтирилиши мумкин

Давлат Думасида миграция сиёсатига оид янги қонун лойиҳалари тайёрланмоқда. Бу ҳақда парламент қуйи палатаси раиси Вячеслав Володин маълум қилди.

Таклифларга кўра, уч ойдан ортиқ муддатга Россияга келаётган хорижий фуқаролар учун мажбурий тиббий кўрикдан ўтиш муддатини 90 кундан 30 кунгача қисқартириш режалаштирилмоқда.

Шунингдек, давлат органларининг мигрантлар соғлиғи ҳақидаги хабардорлигини ошириш таклиф қилинмоқда. Бунда тиббиёт муассасалари шифокорлар хулосалари натижаларини – ИИВга, аниқланган юқумли касалликлар ҳақидаги маълумотларни эса Роспотребнадзорга тақдим этиши керак бўлади.

Қонун лойиҳасида тиббий кўрикдан бўйин товлаган шахсларга нисбатан маъмурий жавобгарликни жорий этиш ҳам назарда тутилган. Бундай ҳолларда жарима солиниши ва суд қарори билан мажбурий равишда Россиядан чиқариб юбориш мумкин бўлади. Шу билан бирга, хавфли касалликлар йўқлиги ҳақидаги ҳужжатларни сохталаштириш учун жиноий жавобгарликни кучайтириш таклиф этилмоқда.

Эслатиб ўтамиз, 2024 йил ноябр ойида Россияда меҳнат мигрантлари учун мажбурий тиббий суғурта полисини олиш қоидалари ҳам қатъийлаштирилган эди. Володиннинг таъкидлашича, ишлаш ва ижтимоий кафолатлардан фойдаланишни истаган хорижий фуқаролар бу ҳуқуқни ҳалол меҳнат билан тасдиқлаши керак.