Месси яна жаҳон юлдузларига қарши майдонга чиқади

Аргентиналик 37 ёшли ҳужумчи Лионель Месси тўп тепаётган МЛС клуби “Интер Майами” ФИФА томонидан 2025 йилги клублар ўртасидаги жаҳон чемпионатига таклиф қилинади, деб хабар бермоқда Marca.

Мусобақа 2025 йилнинг ёзида АҚШда бўлиб ўтади ва тарихда 32 та клуб иштирокида янги форматда ўтказиладиган илк клублар ўртасидаги жаҳон чемпионати бўлади.

Испания нашри хабарига кўра, ФИФА МЛС чемпиони аниқланишини кутмасдан, "Интер Майами"га мезбон мамлакатдан ягона квотани беришни режалаштирган. Бу ҳақда тез орада расман эълон қилиниши хабар қилинган.

МЛСнинг навбатдаги мавсуми якунланишига бир тур қолганида, 33 ўйинда 71 очко тўплаган "Интер Майами" ўз натижаларига кўра лиганинг энг яхши клуби бўлиши кафолатланган. Бунда МЛС чемпиони плей-офф натижаларига кўра аниқланади.