Мерц Нью-Йоркдаги БМТ Бош Ассамблеяси йиғилишига боришини бекор қилди

Мерц партиясининг сайловдаги муваффақиятсизлигидан сўнг Нью-Йоркдаги БМТ Бош Ассамблеяси йиғилишига боришини бекор қилди — Reuters.

Агентлик суҳбатдошларининг айтишича, Фридрих Мерцнинг АҚШга сафари бекор қилиниши 6 сентябрь куни Саксония-Анхальт федерал ери парламентига бўлиб ўтган сайловларда унинг партияси — Христиан-демократик иттифоқ (ХДС)нинг паст натижа кўрсатгани туфайли ички сиёсий босим кучайиши билан боғлиқ.

Бу сайловларда ғалабани ўта ўнг «Германия учун альтернатива» (АдГ) партияси қўлга киритди. У сайловчиларнинг 43,8 фоиз овозини олди. ХДС эса 17,2 фоиз овоз тўплади. Таққослаш учун: ушбу федерал ерда 2021 йилда бўлиб ўтган аввалги ландтаг сайловларида АдГ 20,8 фоиз, ХДС эса 37,1 фоиз овоз олган эди.

Reuters ва Deutschlandfunk радиоси маълумотларига кўра, 20 сентябрь куни — Мекленбург-Ғарбий Померания ва Берлин ландтагларига сайловлар бўлиб ўтадиган куни — Мерц ХДС раҳбариятининг навбатдан ташқари йиғилишини белгилаган.

Журналистлар таъкидлашича, Германия аҳолиси орасида Фридрих Мерцни қўллаб-қувватлаш даражаси пасаймоқда. Немисларнинг атиги 14 фоизи у Германия канцлери вазифасини яхши бажараётганини ҳисоблайди. Шу билан бирга, сўровда қатнашганларнинг 78 фоизи Мерцнинг канцлерлик фаолиятидан норози эканини билдирган. Ҳокимиятдаги консерватив ХДС/ХСС блоки сайловчилари орасида ҳам Мерцни қўллаб-қувватловчилар улуши атиги 36 фоизни ташкил этган.