Қирғизистон бош вазири Мухаммадкалий Абилгазиев меҳнат ва ижтимоий ривожланиш вазири ўринбосари Зууракан Каденовани унинг самолёт экипажи билан жанжаллашгандан сўнг халқаро рейсдан олингани ҳақида хабар пайдо бўлгандан кейин лавозимидан бўшатди.
Аввалроқ ижтимоий тармоқларда Каденова “Эйр Астана” авиакомпаниясининг Сеул-Олмаота йўналиши бўйича парвоз қилиши керак бўлган самолётда жанжал чиқаргани ҳақида маълумот пайдо бўлган. Гувоҳларнинг таъкидлашича, юқори лавозимли амалдор борткузатувчилар билан жанжаллашиб, уларга дипломатик паспортини кўрсатган. Оқибатда экипаж сардори аёлни рейсдан олишга қарор қилган.
Айни вақтда Каденова Сеулдаги меҳмонхоналардан бирида қолмоқда. Унинг кейинги рейс билан ватанига қайтарилиш масаласи кўрилмоқда. Аёл Сеулда Қирғизистоннинг расмий делегацияси таркибида бўлган.
Manba: kun.uz
