Литвада тўртинчи америкалик ҳарбийнинг жасади топилди

Ўтган ҳафта Литвада машғулотлардан сўнг бедарак йўқолган тўртинчи америкалик ҳарбий ҳалок бўлди.

Бу маълумотни АҚШ армияси Европа ва Африкадаги қўмондонлиги тасдиқлади.

"АҚШ армиясининг 3-пиёда дивизиясининг 1-зирҳли бригада жанговар гуруҳига тайинланган тўртинчи аскари Пабраде (ўқув полигони) яқинида ўлик ҳолда топилди", — дейилади баёнотда.

Болтиқбўйи республикаси президенти Гитанас Науседа ҳарбий хизматчининг вафоти муносабати билан ҳамдардлик билдирди.

"Биз Қўшма Штатлар ва Америка халқига самимий ҳамдардлигимизни билдирамиз", деб ёзади Науседа Х ижтимоий тармоғида. "Бундай оғир шароитда бедарак йўқолган аскарни топиш учун улкан саъй-ҳаракатларни амалга оширган барчага чуқур миннатдорчилик билдирамиз".

Аввалроқ Литва президенти матбуот хизмати 3 нафар америкалик аскар ҳалок бўлгани ҳақида хабар берган эди.

Эслатиб ўтамиз, 25 март куни кечқурун Литванинг Пабраде шаҳридаги марказий ҳарбий полигонида ўтказилган машғулотлардан сўнг тўрт нафар америкалик ҳарбий M88 Hercules зирҳли қутқарув машинасида қолиб, ғойиб бўлган эди. Вертолётлар иштирокида узоқ давом этган қидирув ишлари натижасида АРВ ботқоқликдан топилган.