Коронавирусга чалинганлар даволанаётган меҳмонхонада ёнғин: 7 киши ҳалок бўлди

Ҳиндистоннинг Aндхра Прадеш штатидаги меҳмонхонада ёнғин чиқди. Ушбу меҳмонхона коронавирусга чалинганлар даволанадиган касалхонага айлантирилганди.

Ёнғин натижасида 7 киши ҳалок бўлди ва 15 киши жароҳат олди. Бу ҳақда бугун, 9 август куни “ТAСС” хабар берди.

Ёнғин Вижайвада шаҳрида қисқа туташув туфайли содир бўлганлиги аниқланди. Барча жабрланганлар зудлик билан касалхонага ётқизилган, уларнинг баъзилари оғир аҳволда, дея хабар беради полиция.

Манбанинг хабар беришича, ёнғин туфайли беморлар ваҳима қўзғашган, бунинг натижасида бир неча киши деразадан сакраб тушишган. Бинода жами 22 бемор даволанаётганди.

Маълумот учун, бугунги кунда Ҳиндистонда 2,08 миллион киши коронавирус билан касалланган. Мамлакат инфекцияга чалинганлар сони бўйича учинчи ўринда туради.