Бугун 1 июнь — Халқаро болаларни ҳимоя қилиш куни муносабати билан Кинематография агентлиги, Республика маънавият ва маърифат маркази, Мактаб ва мактабгача таълим вазирлиги ҳамкорлигида «Янги Ўзбекистоннинг бахтли болалари» шиори остида тадбир ўтказилди.
Республика бўйлаб ёш томошабинлар учун Кинематография агентлиги буюртмасига биноан яратилган 10 дан ортиқ фильмларнинг бепул намойишлари ташкил этилди. Жумладан, “Буюк ипак йўли бўйлаб саёҳат” туркуми остида яратилган «Тўмарис» миллий анимацион фильми, «Парининг совғаси», «Қуёш таъми» эртак фильмларининг катта премьераси бўлиб ўтди. Шунингдек, 5 ёшдан 15 ёшгача бўлган ёш томошабинлар аудиторияси учун “Автосаргузаштлар” мультсериали, “Сеҳрли ҳасса”, “Амир Темур”, “Дино ва Завр”, “Хасис баққол” каби мультфильмларнинг ҳам намойиши бўлиб ўтди.
Бундан ташқари, кун давомида Ўзбекистон Миллий кино санъати саройида болалар учун шоу-концерт дастурлари, турли мультфильм қаҳрамонлари иштирокида ўйинлар, қизиқарли савол-жавоблар ўтказилди. Шу билан бирга, болажонларни хурсанд қилиш мақсадида кино сарой ёзги ҳовлисида турли аттракционларнинг бир кунлик фаолияти йўлга қўйилди.
Киносаройга ташриф буюрган болалар ва уларнинг ота-оналари анимацион фильмлар тақдимоти, шу билан бирга кун давомида уларга ҳамроҳ бўлган мультфильм қаҳрамонларидан мамнун эканликларини таъкидлаб, хурсандчиликлари билан ўртоқлашишди.
Бугун асосий премьераси ташкил этилган «Тўмарис» миллий анимацион фильми, «Парининг совғаси», «Қуёш таъми» эртак фильмлари 1-2 июнь кунлари барча давлат ва нодавлат телеканалларида ҳам намойиш қилинади.
