Украина Бош разведка бошқармаси Малидаги пистирма уюштиришда иштирок этгани, натижада Вагнернинг 80 дан ортиқ жангариси ҳалок бўлганини маълум қилди.
Вагнер раҳбариятига алоқадор Telegram канали 29 июль куни гуруҳ ўтган ҳафта Малидаги жангларда катта йўқотишларга учраганини тан олди. Телеканалнинг таъкидлашича, Вагнер ва Мали ҳарбийлари оғир қуроллар, учувчисиз самолётлар ва худкуш-террорчиларни қўллаган Туарег бўлгинчи кучлари коалициясига қарши беш кун давомида шиддатли жанглар олиб борган.
Телеканал муаллифи кўплаб «Вагнер» жангчилари, жумладан, қўмондон Сергей Шевченко ҳалок бўлганини тан олди.
Украина Бош разведка бошқармаси ҳарбий разведкаси вакили Андрей Юсовнинг айтишича, «исёнчилар [Украина разведкасидан] зарур маълумотларни олган, бу уларга россиялик ҳарбий жиноятчиларга қарши муваффақиятли ҳарбий операция ўтказиш имконини берган».
Юсов украиналик ҳарбийлар жангларда қатнашганми ёки мамлакатда бўлганми, аниқламади. Унинг сўзларига кўра, Украина Бош разведка бошқармаси «ҳозир тафсилотларни муҳокама қилмайди».
Ўтган май ойида Қўшма Штатлар Малидаги Вагнер раҳбарига қарши санкциялар киритган эди. Вашингтон гуруҳни Саҳелдаги операцияларидан Украинадаги урушга қарши курашиш учун ҳарбий техника олиш учун канал сифатида фойдаланганликда айблади.
