Жанубий Корея собиқ ички ишлар вазири етти йилга озодликдан маҳрум қилинди

Жанубий Кореянинг собиқ ички ишлар ва хавфсизлик вазири Ли Санг Мин 2024 йил декабрь ойида собиқ президент Юн Сок Ёлга ҳарбий ҳолат эълон қилишда ёрдам бергани учун етти йилга озодликдан маҳрум қилинди.

Бу ҳақда Yonhap ахборот агентлиги хабар берди.

Вазир бўлиб ишлаган пайтида Ли Санг Мин ўт ўчириш хизмати ва полицияга президентни танқид қилган оммавий ахборот воситалари биноларига электр ва сув таъминотини ўчиришни буюрган.

Суд шунингдек, собиқ вазирни қасам ичиб ёлғон кўрсатма беришда айбдор деб топди, чунки у бундай буйруқлар берганини рад этди. Суд жараёнида у ҳарбий ҳолатни режалаштиришда иштирок этганини рад этди ва собиқ президентнинг фармонини исён эълон қилиш деб ҳисоблаш мумкин эмаслигини таъкидлади.

Прокурорлар собиқ ички ишлар вазирига 15 йиллик оғирроқ жазо беришни сўрашган эди. Агентлик маълумотларига кўра, Ли Санг Мин собиқ маъмуриятнинг ҳарбий ҳолат жорий этилиши билан боғлиқ ҳолда судланган иккинчи аъзоси. Январь ойида Жанубий Корея суди собиқ бош вазир Хан Дек Суни 23 йилга озодликдан маҳрум қилди.

Аввалроқ, Мудофаа вазирлиги собиқ президентга ҳарбий ҳолат жорий этишда ёрдам берган тахминан 180 нафар ҳарбий хизматчини аниқлагани ҳақида хабар берилган эди.