Жаҳон захира валютаси нима учун янада қадрсизланиш хавфига дуч келиши мумкин?

The Economist таъкидлашича, долларнинг мустаҳкамлиги АҚШга бўлган халқаро ишонч билан тенглаштириб бўлмайди.

Ўтган йилдан буён Трамп жорий этган тарифлар ва сунъий интеллект атрофидаги хавотирлар Америка акцияларига бўлган ишончни аста-секин сусайтирмоқда. Охирги беш йилда глобал акция жамғармаларига кирган энг катта капитал оқими Европага тўғри келди — бу 2009 йилдан бери кузатилмаган даража. АҚШ бозорини юқорига етаклаб келган технологик гигантлар — “Великолепная семёрка” — сўнгги тўрт ойда асосан бир маромда, кескин ўсишсиз савдоланди. Дастурий таъминот сектори ўсишни давом эттирди, бироқ энергетика ҳамда ривожланаётган бозорлар акциялари ҳам жонланди.

Сармоядорлар Америка иқтисодий устунлиги узоқ давом этади, деган қарашга аввалгидек ишонч билан эмас, анча эҳтиёткорона муносабат билдирмоқда. Илгаригидек бозор пасайганда фаол харид қилишга шошилмаяпти. Ўн йиллар давомида “Америка активларига муқобил йўқ” деган тамойил устувор эди. Аммо апрель ойида Трамп янги тарифлар эълон қилгач, узоқ муддатли казначейлик облигациялари даромадлилиги ошди, акциялар эса бир вақтнинг ўзида тушди. Худди шундай ҳолат октябрь ва январь ойларидаги савдо кескинлашуви пайтида ҳам такрорланди.

Сармоядорлар тобора АҚШ учун “қайта молиялаштириш хавфи”га — яъни ўсиб бораётган давлат қарзини хизмат қилиш қобилиятига — эътибор қаратмоқда. Ҳозир “Катта еттилик” мамлакатлари облигацияларининг ўртача даромадлилиги АҚШникидан юқори, бу эса уларни нисбатан жозибадор қилади. 2,8% даромадлилик билан АҚШнинг 10 йиллик облигациялари ўхшаш қарз инструментлари орасида энг паст даромадни таклиф қилмоқда. АҚШдаги ўртача даромад даражаси аввал G7 ўртачасидан 2,2 фоиз пункт юқори бўлган бўлса, ҳозир бу фарқ бор-йўғи 1,2 пунктгача қисқарган.