Италия “Тинчлик кенгаши”нинг ҳозирги форматида иштирок этмайди

Мелони Италия “Тинчлик кенгаши”нинг ҳозирги форматида иштирок этмаслигини айтди ва Трампдан уни ўзгартиришни сўради.

Италия бош вазири Жоржа Мелони мамлакат конституциясига зид бўлгани сабабли АҚШ президенти Доналд Трампдан “Тинчлик кенгаши”нинг форматини қайта кўриб чиқишни сўради. Мелони бу ҳақда Германия канцлери Фридрих Мерц билан бўлиб ўтган ҳукуматлараро саммитда маълум қилди.

Мелони ва Мерцнинг фикрича, кенгашда амалда бўлган қарор қабул қилиш тизими миллий суверенитетнинг бир қисмини ташқи органга топширишни назарда тутади. Бундай ёндашувни Италия ва Германия конституцияларига ўзгартириш киритмасдан туриб қабул қилиниши мумкин эмас. Шу сабабли Италия ва Германия кенгаш тузилмасини ислоҳ қилиш, уни янада очиқ ва барча иштирокчилар учун тенг шароит яратадиган механизмга айлантиришни таклиф қилмоқда.

“Тинчлик кенгаши” АҚШ президенти Доналд Трампнинг тинчлик режасига мувофиқ урушдан кейин Ғазо секторини бошқариш органи сифатида ишлаб чиқилган. Бироқ Bloomberg танишиб чиққан низомга кўра, Тинчлик кенгаши анча кенгроқ функцияларга эга ва у БМТнинг муқобили бўлиши мумкин.

Кенгаш низомида унга Трамп раислик қилиши ва барча қарорлар у тасдиқлаганидан кейин қабул қилиниши белгиланган. Доналд Трамп АҚШ президенти лавозимини тарк этганидан кейин ҳам “Тинчлик кенгаши”га раислик қилишда давом этади ва ўзи истаган вақтдагина бу лавозимдан истеъфога чиқади.

Bloomberg'нинг қайд этишича, кенгаш низомида мамлакатлар доимий аъзолик учун камида бир миллиард доллар бадал тўлаши кераклиги ҳақида банд ҳам бор. Бу маблағларни эса Трамп назорат қилиши белгиланган.