Ҳизбуллоҳнинг Сурия орқали қурол контрабандаси йўли тўхтатилди

Сурияда Башар ал-Ассад режими ағдарилганидан бери Исроил Суриядаги кўплаб ҳарбий объектларни вайрон қилди, бу эса Эрондан Ливанга қурол контрабандаси йўлларини ҳам тўхтатгани айтилади.

Эрон томонидан қўллаб-қувватланадиган Ҳизбуллоҳ террор ташкилоти раҳбари Наим Кассем ўз нутқида буни тасдиқлади: «Ҳизбуллоҳ ҳарбий таъминот йўлини йўқотди». Бироқ, унинг айтишича, бу Исроилга қарши давом этаётган курашдаги «кичик тафсилот» холос. Кассемнинг таъкидлашича, гуруҳ «мослашувчан» бўлиб қолмоқда.

Эрон илгари Ҳизбуллоҳнинг асосий ҳомийси бўлган ва уни қуруқлик йўллари орқали, жумладан, Сурия орқали етказиб берган. Теҳрон билан иттифоқдош бўлган Сурия режимининг ағдарилиши Эроннинг ўзининг асосий душмани деб билган Исроилга қарши курашдаги позициясига жиддий зарба бўлди.

Суриядаги исломчилар бошчилигидаги исёнчилар коалицияси ҳақида гапирар экан, Кассем: «Суриядаги янги ҳукумат Исроилни душман деб билади ва у билан муносабатларни нормаллаштирмайди, деб умид қиламиз», деди.

Ўтган ой сулҳ эълон қилинишидан олдин Ҳизбуллоҳ ва Исроил ўртасида шиддатли жанглар бўлган эди.

Сурияда ҳокимиятни қўлга олган «Ҳаят Таҳрир аш-Шом» (HTS) коалицияси етакчиси Абумуҳаммад ал-Жўланийнинг айтишича, у ва унинг исёнчилари янги можаролардан манфаатдор эмас. Унинг сўзларига кўра, Суриянинг кўп йиллик уруш ва вайроналардан кейинги ҳолати янги тўқнашувлар бошланишига имкон бермаяпти. Ал-Жоланийнинг таъкидлашича, дипломатик ечимлар хавфсизлик ва барқарорликка эришишнинг ягона йўли ва «шошилинч ҳарбий саргузаштлар» номақбулдир.

Айни пайтда Британиянинг «Ҳало Труст» гуманитар ташкилоти халқаро ҳамжамиятни Сурия ҳудудини тозалаш ва унинг хавфсизлигини таъминлаш учун ҳаракат қилишга чақиради.

«Уйга қайтган сурияликлар миналанган ҳудудлар қаерда эканлигини билишмайди. Миналар далалар, қишлоқлар ва шаҳарлар бўйлаб тарқалиб, одамларни доимий ўлим хавфи остида қолмоқда», — дейилади ташкилот баёнотида.

Айни пайтда, ташкилот маълумотларига кўра, Сурияда миллионлаб пиёдаларга қарши миналар, портламаган ўқ-дорилар ва кассетали бомбалар мавжуд. Баъзи ҳисоб-китобларга кўра, миналарни тўлиқ тозалаш жараёни ўнлаб йиллар давом этиши мумкин.