«Pandora Papers» деб ном олган журналистик суриштирув доирасида дунёнинг 600 дан ортиқ журналистлари машҳур сиёсатчилар, бой кишилар ва таниқли шахсларнинг яширин бойлиги ва солиқдан қочиш ҳолатларини аниқлашди. Улар 11,9 млн ҳужжатларни таҳлил қилиб чиқишган, дея хабар бермоқда BBC.
«Pandora Papers» доирасида 6,4 млн ҳужжатлар, қарийб 3 млн суратлар, 1 млндан ортиқ электрон почта хатлари ва қарийб 500 минг жадваллар ўрганилган. Ўрганилган ҳужжатлар Панама, Дубай, Монако, Швейцария ва Кайман ороллари каби «солиқ жаннатлари»да тузилган офшор тузилмалар ва трастлар бўйича бўлган.
Халқаро журналистлар томонидан эълон қилинган ҳужжатларда шоу-бизнес ва спорт юлдузлари ҳам офшорлардан фойдаланганлиги айтилган. Улар орасида мусиқачи Ринго Старр, қўшиқчилар Элтон Жон, Хулио Иглесиас ва Шакира, «Реал Мадрид» футбол клуби мураббий Карло Анчелотти ва бошқалар мавжуд.
Масалан, ҳозирда «Манчестер Сити» бош мураббийи Хосеп Гвардиола футболчилик фаолиятининг сўнггида Қатарнинг “Ал-Аҳли” клубида ўйнаган ва у ерда 2 йил давомида топган пулини ватани бўлмиш Испанияда декларация қилмаган. Бундан мақсад Испанияда солиқ тўлашдан қочиш бўлган.
“Ал-Аҳли” Гвардиолага йилига 2 миллион евро миқдорида маош тўлаган, Пеп бу маблағни Андоррадаги банк ҳисобига ўтказишни сўраган. Сабаби, у ерда солиқ тўланмаган.
Ҳозирда Мадриднинг “Реал” клубини бошқараётган Карло Анчелотти эса Британия Виргин оролларида рўйҳатдан ўтказилган Vapia Limited компаниясининг эгаси ҳисобланади. Ушбу компания 25 миллион евролик мулк ва ҳуқуқларга эга.
Аввалроқ Анчелотти ўз айбини қисман тан олиб, тўланмаган 1 миллион евро миқдоридаги солиқни қайтаришга рози бўлганди. Унинг солиқлардан умумий қарзи эса 1 миллион 460 минг еврони ташкил қилади.
"Йигит айтади ҳам, қайтади ҳам"
Шахмат бўйича жаҳон чемпиони Гарри Каспаров ҳибсга олинди
Хави келажаги борасида бир қарорга келди
