Германия компанияларининг АҚШга тўғридан-тўғри инвестициялари 2026 йилнинг биринчи ярмида ўтган йилнинг шу даврига нисбатан қарийб учдан икки қисмга қисқариб, 4,3 млрд евро (5 млрд доллар)ни ташкил этди.
Бу 2023 йилдан бери энг паст кўрсаткич, деб ёзмоқда "Reuters" Германия иқтисодиёт институти (IW) ҳисоб-китобларига таяниб. 2024 йилнинг биринчи ярми билан солиштирганда пасайиш қарийб 80 фоизга етган.
Пандемиягача бўлган беш йилда Германия компаниялари АҚШга биринчи ярим йилликнинг ўзида ўртача 15,8 млрд евро сарфлаган — бу ҳозирги кўрсаткичдан қарийб тўрт баравар кўп.
IW эксперти Самина Султан пасайиш Дональд Трампнинг иккинчи президентлик муддати бошланганидан бери кузатилаётганини таъкидлади. Компанияларни, аввало, АҚШ импорт божлари ва савдо сиёсатидаги ноаниқлик эҳтиёткор бўлишга мажбур қилмоқда.
Шу билан бирга, АҚШда аллақачон ишлаётган немис компаниялари у ерда олган фойдасини қайта инвестиция қилишда давом этмоқда. Асосий пасайиш янги капитал қўйилмаларда кузатилмоқда. Бу АҚШ бозори жозибадорлигини йўқотмагани, аммо бизнес янги йирик лойиҳаларни бошлашга шошилмаётганини кўрсатади.
Бу Германия иқтисодиётининг ўзи ҳам қатор муаммоларга дуч келган пайтга тўғри келмоқда. Мамлакат статистика идораси Германия экспортига Хитой рақобати ва АҚШ божлари босим ўтказаётганини қайд этган.
2022 йилдан кейин Россиядан қувур орқали газ етказиб бериш кескин қисқаргач, Германия муқобил, жумладан, суюлтирилган газ манбаларига ўтди. Европа энергия нархлари эса урушгача бўлган даврга нисбатан ҳали ҳам юқори бўлиб, айниқса энергияни кўп талаб қиладиган саноат тармоқларининг рақобатбардошлигига таъсир қилмоқда.
Роналдунинг тўйида онаси қатнашмади
Cobalt’нинг Ўзбекистондаги сотувлари 2 бараваргача тушиб кетди
Мен Хитой-Қирғизистон-Ўзбекистон темир йўли қурилиши учун Путиннинг розилигини олганман – Садир Жапаров
