Германияда турар жой биносига метеорит тушди

Германия ғарбидаги Рейнланд-Пфалз федерал еридаги Кобленс шаҳрида 8 март куни кечқурун турар-жой биноси томига метеорит тушди.

ZDF Heute'нинг аниқлик киритишича, метеорит бўлаги томни тешиб ўтган, сўнгра уйнинг ётоқхонасига тушган, аммо бу хонада одамлар бўлмаган.

Полиция вакили DPA агентлигига қулаган метеоритлар бошқа ҳудудлардаги томлар ва уйларга ҳам зарар етказганини билдирган. Бундай хабарлар, хусусан, Хунсрюк ва Айфел туманларидан келган.

Кайзерслаутерн полицияси маълумотларига кўра, гувоҳлар осмонда "оловли чақнашлар" ҳақида хабар беришган, баъзилар эса бу ракета бўлиши мумкинлигидан қўрқишган, бироқ хавфсизликка нисбатан таҳдид аломатлари аниқланмаган.