Германияда ирқчи неонацистлар гуруҳининг фаолияти тақиқланди

Германия Ички ишлар вазирлиги ирқчи неонацистлар гуруҳи “Hammerskins Germany”фаолиятини тақиқлади.

Бу ҳақда “Nachrichten.at” нашри маълум қилди, деб ёзади “Report” .

Маълум қилинишича, ўта ўнгчи “Hammerskins” ва уни қўллаб-қувватловчи “Crew 38” гуруҳлари Германия конституциясига қарши гапиргани учун тақиқланган.

Маълумотларга кўра, 19-сентябр куни Германиянинг 10 штатидаги 28 та аҳоли пунктида гуруҳ марказларида операция ўтказилиб, уларнинг моллари олиб қўйилган.

Ички ишлар вазири Ненси Файзер бу тақиқнинг уюшган ўта ўнглар учун оғир зарба эканлигини айтди: “Бу билан Германияда халқаро даражада фаолият юритаётган неонацист ташкилотининг инсониятга қарши ҳаракатларига чек қўйдик. Бу билан биз ирқчилик ва антисемитизмга қарши аниқ сигнал юбордик”.

Вазир таъқиқлашга тайёргарлик бир йил давомида олиб борилганини таъкидлаб, АҚШ раҳбариятига бу йўналишдаги кўмак учун ўз миннатдорчилигини билдирди.

Маълумотларга кўра, Германияда тахминан 130 аъзоси борлиги айтилган "Hammerskins Germany" 1988 йилда АҚШда ташкил этилган "Hammerskins Nation" ташкилотининг давоми ҳисобланади. Гуруҳ Германияда концерт тадбирларини ташкил қилиш орқали ўта ўнг ташвиқотни олиб боради. Бу гуруҳнинг тугатилиши билан Германия Ички ишлар вазирлиги томонидан тақиқланган ирқчи ташкилотлар сони 20 тага етди.