Тожикистон телеканалларида газланган ширин ичимликлар рекламасини намойиш этиш тақиқланди.
Тақиқни телеканаллар эмас, Тожикистон ҳукумати ҳузуридаги Телерадиоэшиттириш қўмитаси жорий этган. Реклама берувчилар эса бундан бехабар қолган.
“Тожик телеканалларида Кока-кола рекламаси тўхтатилиши ҳақида бизга хабар берилмади. Тушунишимизча, тақиқ барча газланган ва қувват берувчи ичимликларга тегишли. Тақиқнинг сабаблари ҳақида аниқ жавоб олишнинг иложи бўлмади”, – деди компаниянинг Тожикистондаги вакиллари.
Ушбу тақиқ Тожикистонда соғлом овқатланиш тарғиботи билан боғлиқ бўлиши мумкинлиги айтилмоқда. Сентябрь ойи охирида ҳукумат 2019-2024 йилларда семизликнинг олдини олиш ва соғлом овқатланишни шакллантириш бўйича дастур қабул қилган эди.