Францияда 9 ёшли украиналик қизга уйланмоқчи бўлган британиялик эркак қўлга олинди

Францияда украиналик тўққиз ёшли қизга уйланмоқчи бўлган эркак қўлга олинди.

Бу ҳақда Daily Mail нашри хабар берди.

21 июнь, шанба куни Париждаги Диснейленд ходимлари тонгда бўлиб ўтиши керак бўлган шахсий тадбирга оиласи билан бола ва 100 га яқин меҳмонлар келганини кўриб, полицияга қўнғироқ қилишди. Байрам ташкилотчиси 22 ёшли "куёв" – Британия фуқароси бўлиб чиқди, "келин"нинг онаси – 41 ёшли украиналик аёл ҳам бўлган. Воқеа жойига тезкорлик билан етиб келган полиция ходимлари эркак ва аёлни қўлга олди.

"Ҳаммамиз тўйга борамиз деб ўйлагандик... Ҳамма ҳайратда қолди, ҳеч ким буни кутмаган эди. Диснейленд ажойиб иш қилди. Келиннинг болалигини англаб етган заҳоти ҳаммасини бекор қилишди. Буни кўриб ҳайратда қолдик", деб тан олди тўйга меҳмон сифатида таклиф қилинган манба.

Прокуратура тўй саҳналаштирилган деб ҳисобламоқда. Куёв полицияга продюсерлик компанияси директори эканлигини ва улар видео суратга олишаётганини тушунтиришга уринган.

Маълумотларга кўра, тўққиз ёшли қизча ҳеч қандай зўравонликка дучор бўлмаган. Шунга қарамай, воқеа юзасидан жиноий иш очилган.