Финляндиядаги музейда «Ленин мототцикли» сотувга қўйилди

Финляндиянинг Тампере шаҳрида жойлашган, ноябрь ойида ёпиладиган Ленин музейи совет даврида ишлаб чиқарилган мототциклни кимошди савдосига қўйди.

1972 йилда ишлаб чиқарилган «Днепр К-650» ён аравачаси бўлган мототцикл 2016 йилдан бери Ленин музейида Лениннинг мумдан ясалган фигураси билан бирга кўргазмага қўйилган ва у билан суратга олиш мумкин эди.

Аукционда бошланғич баҳоси – 740 евро.

«Финляндия-Совет Иттифоқи» жамияти томонидан ташкил этилган музей 1946 йил 20 январда Финляндиянинг Тампере шаҳрида Ленин вафотининг йиллиги муносабати билан очилган. 2024 йил апрель ойида музей ўзининг охирги иш куни 3 ноябрь бўлишини эълон қилди.

Ленин музейи ўрнида сиёсий тарих музейи ташкил этилиши кутилмоқда, унинг кўргазмалари Финляндия мустақиллигидан то НАТОга қўшилишгача бўлган Россия-Финляндия муносабатлари тарихига бағишланган.