Фарғона вилоятида МИБ ходимлари ўнлаб болаларга мактаб совғаларини улашди

Янги ўқув йили арафасида Мажбурий ижро бюросининг Фарғона вилоятидаги бўлимлари ходимлари томонидан кенг кўламли хайрия акцияси ўтказилди.

Ушбу ташаббус доирасида кам таъминланган оилалар фарзандларига ўқув қуроллари ва мактаб сумкалари совға қилинди.

Акцияга пухта тайёргарлик кўрилиб, МИБ бўлимларида турли ўқув қуроллари, дафтарлар, қаламлар, китоблар ва мактаб сумкалари рисоладагидек жамланди.

Сўнг ходимлар вилоятнинг турли ҳудудларига йўлга чиқиб, болажонларга ўз совғаларини тантанали равишда топширдилар.

Совғаларни қабул қилиб олган ўқувчиларнинг юз-кўзларидаги хурсандчилик, беғубор табассумлар барчага кўтаринки руҳ бағишлади.

Болажонлар ўз орзуларини, келажакда шифокор, ҳарбий ёки бошқа касб эгаси бўлиш ниятларини мамнуният билан бўлишдилар. Бу каби эътибор ва ғамхўрликнинг болаларни қанчалик бахтиёр қилиши яна бир бор ўз тасдиғини топди.

МИБ ходимларининг таъкидлашича, бундай хайрли ишлар нафақат болаларга, балки уларнинг ўзларига ҳам чексиз қувонч бағишлади ва меҳнат самарасини ҳис этишга ёрдам берди.

Вилоятдаги барча 19 та туман ва шаҳарларда ҳам шу каби акциялар муваффақиятли ўтказилди. Ташаббус доирасида юзлаб болалар янги ўқув йили олдидан кутилмаган ва жуда зарур совғаларга эга бўлишди. Мажбурий ижро бюроси жамиятнинг ижтимоий ҳаётида фаол иштирок этиб, ёш авлодни қўллаб-қувватлашга қаратилган бу каби эзгу ишларни келгусида ҳам давом эттириш ниятида.