Даниялик дастурчилар Европа Иттифоқининг шахсий маълумотларни ҳимоя қилиш талабларига мос ишлайдиган GDPRchat номли сунъий интеллект чатботини тақдим этди.
Лойиҳа Европа Иттифоқининг Маълумотларни ҳимоя қилиш бўйича умумий регламенти (GDPR) талабларига мувофиқ ишлаб чиқилган. Чатбот Франциянинг Mistral AI компанияси тилий модели асосида ишлайди, барча серверлари эса Германиянинг Hetzner дата-марказларида жойлашган.
Ишлаб чиқувчиларнинг таъкидлашича, хизмат фойдаланувчиларнинг маълумотларини фақат Европа Иттифоқи ҳудудида сақлайди ҳамда учинчи томон аналитикаси, кузатув ёки реклама тизимларидан фойдаланмайди.
Интернетдан маълумот излаш учун GDPRchat АҚШда жойлашган Brave Search тизимидан фойдаланади. Бироқ компаниянинг таъкидлашича, қидирув тизимига фақат сўров матни юборилади, IP-манзил ёки фойдаланувчини аниқловчи бошқа маълумотлар узатилмайди.
Лойиҳани ишлаб чиққан FRITS AI компанияси раҳбари Ларс Колинднинг айтишича, сервис европалик фойдаланувчилар маълумотларини Европа қонунчилиги асосида ҳимоя қилади ва улардан қандай фойдаланилишини очиқ тушунтиради.
Ҳозирда GDPRchat веб-сайт, Google Play ва App Store орқали 16 ёшдан катта фойдаланувчилар учун мавжуд. Хизмат бепул ва пуллик тарифларни таклиф этади, аммо юқори талаб сабабли янги фойдаланувчилар ҳозирча кутиш рўйхати орқали қабул қилинмоқда.
GDPRchat'нинг ишга туширилиши Европада рақамли суверенитет ва шахсий маълумотларни ҳимоя қилишга бўлган эътибор кучайиб бораётганини яна бир бор намоён этмоқда.
Актёр Абдуманнон Убайдуллаев вафот этди
Эрон АҚШ билан уруш пайтида Шимолий Кореядан қурол олган
"Ҳўрмуз бўғози ўзининг стратегик аҳамиятини йўқотиши мумкин"
