Эрон ядровий қуролга эга бўлиш билан таҳдид қилмоқда

Эрон олий раҳбарининг катта маслаҳатчиси Али Ларижонийнинг айтишича, Теҳрон АҚШ ёки унинг иттифоқчилари томонидан ҳужумга учраса, ядровий қурол яратишга мажбур бўлади. Бу ҳақда у Эрон давлат телевидениеси орқали айтди.

“Биз ядро қуролига эга бўлмоқчи эмасмиз, лекин агар хато қилсангиз, ўзингиз Эронни бунга ундайсиз, чунки мамлакат ўзини ҳимоя қилиши керак”, - дея таъкидлади Ларижоний. Унинг сўзларига кўра, босим остида Эроннинг “бошқа танлови қолмайди”.

Бу баёнот Доналд Трамп Эрон ядровий дастури бўйича музокараларга рози бўлмаса, “мисли кўрилмаган бомбардимон қилиш” билан таҳдид қилганидан кейин янгради. Олий раҳнамо Али Хоманаий бунга жавобан ташқи тажовуз содир бўлган тақдирда “қаттиқ қасос олиш” ҳақида огоҳлантирган.