Эквадордаги қуролли ҳужумда саккиз киши ўлди

Эквадор жануби-ғарбидаги Гуаякил шаҳридаги Паскуалес маҳалласида камида саккиз киши отиб ўлдирилди.

Бу ҳақда миллий полиция маълум қилди.

Ҳозирда ҳуқуқ-тартибот идоралари ҳужумчини қидирмоқда. Яқинда жиноий гуруҳ аъзоларидан қурол-яроғларнинг тортиб олиниши зўравонликларнинг бошланишига туртки бўлган деб ишонилади.

Сўнгги кунларда шаҳарда қатор қуролли ҳужумлар содир бўлди. Якшанба куни Бастион Популар шаҳридаги уйда тўрт киши ўлдирилган, эртаси куни эса Мучо Лоте мактаби олдида бир эр-хотин отиб ўлдирилган.

Эквадор 2024 йил январида президент Даниэль Нобоа наркотик моддалар савдоси билан боғлиқ уюшган жиноий гуруҳларга қарши “ички қуролли можаро”ни эълон қилганидан бери катта хавфсизлик инқирози билан юзма-юз келмоқда. Ҳукумат “жиддий ички тартибсизликлар” деб атаган сабаб Гуаякилда апрель ойидан бери фавқулодда ҳолат жорий этилган.