30 апрель куни Тошкент металлургия заводида Экология, атроф-муҳитни муҳофаза қилиш ва иқлим ўзгариши вазирлиги ҳамкорлигида «Eco Fest» тадбири бўлиб ўтди.
Тадбир замонавий саноат корхонасида экологик стандартларга амал қилинишининг афзалликларини намойиш этиш, бу борада мутахассислар билан тажриба алмашиш ва келажакда ҳам экологик тамойилларга амал қилиш борасидаги ҳамкорликни мустаҳкамлаш мақсадида ташкил этилди.
«Экология, атроф-муҳитни муҳофаза қилиш ва иқлим ўзгариши вазирлиги томонидан саноат корхоналарида экологик стандартларга амал қилинишига катта эътибор қаратилмоқда, — деди Экология вазири маслаҳатчиси Матназар Элмуродов. — Тошкент металлургия заводида бу борада самарали ишлар амалга оширилмоқда. Хусусан, корхонада чиқиндисиз ишлаб чиқариш йўлга қўйилган. Тадбирдан мақсад заводнинг бу борадаги фаолиятини ўрганиш ва тажриба алмашишдир».
Тадбир давомида корхона бўйлаб экскурция ва экология соҳасидаги ютуқлар тақдимоти намойиш этилди. Шунингдек, қайта ишланган чиқиндилардан тайёрланган маҳсулотлар эко-ярмаркаси ҳам ташкил қилинди. Бунда чиқиндилардан самарали фойданалиш ва атроф-муҳитни чиқинди ташламаслик устувор вазифа эканлиги таъкидланди.
«Саноат корхонаси деганда кўпчиликнинг кўз ўнгига табиатга зарарли моддалар чиқарадиган корхона келади. Аммо бу тушунча нотўғри, чунки саноат корхоналари экологияга зарар етказмасдан ҳам фаолият кўрсатиши мумкин, — деди Тошкент металлургия заводи бош технолог ўринбосари Шерзод Фозилов. — Жумладан, бизнинг заводда замонавий технология ва ишлаб чиқариш жараёнларини автоматлаштириш бўйича илғор ютуқлар жорий этилган бўлиб, бу чиқиндисиз ишлаб чиқаришни амалга ошириш, атроф-муҳитга таъсирини камайтириш ва заводга »Яшил корхона« мақомига эга бўлиш имконини яратади».
Маълумот учун, Тошкент металлургия заводи Марказий Осиёдаги энг йирик совуқ ҳолда ёйилган рух ва полимер қопламали пўлат прокат ишлаб чиқарувчиси бўлиб, ўз соҳасидаги экологик тоза корхоналардан бири ҳисобланади. Оқова сувларни тозалаш ускуналари, шунингдек, атроф-муҳитга чиқадиган чиқиндиларни назорат қиладиган замонавий фильтрлар корхонага рухсат этилган чегаравий меъёрлардан ошмаслигига имкон беради. Жорий йилда корхонада «Тоза энергия», «Тоза ҳаво» экологик лойиҳаларига, шунингдек, уларни сотиш ва утилизация қилиш учун чиқиндилар ҳажмини камайтирадиган янги технологияларни жорий этишга катта эътибор қаратилмоқда.
Бундан ташқари, ТМЗ «Яшил макон» умуммиллий лойиҳасида фаол иштирок этмоқда. Корхона ҳудуди ва унга туташ ҳудудда 12 500 туп дарахт ва бута кўчатлари экилди. Жорий йилда яна 1 500 туп кўчат экиш режалаштирилган.
Тадбир якунида маданий-кўнгилочар дастур ташкил этилиб, корхонанинг табиатга зарар етказмасдан фаолият юритишида жонбозлик кўрсатиб келаётган ходимлар тақдирланди.
Америкаликлар Путин нима учун Шойгуни алмаштирганини тушунтирди
Тожикистон мактаб таълимига тўсқинлик қилганлик учун жиноий жавобгарликни кучайтирди
Алишер Қодиров Россия Давлат думаси спикерига жавоб қайтарди
