ДХХ Қашқадарёда жиҳодчилар гуруҳи фаолиятига чек қўйди

Ўзбекистон Давлат хавфсизлик хизмати Қашқадарёда жиҳодчилар гуруҳи фаолиятига чек қўйди.

Қарши шаҳрида яшовчи 52 ёшли фуқаро муқаддам “Жиҳодчилар”* диний экстремистик оқимига аъзо бўлганлиги учун 2004-2018 йилларда жазо муддатини ўтаган бўлишига қарамасдан, ўзининг яшаш манзилида 1994, 1996, 1998 йилларда туғилган 3 нафар фарзанди ва 2000 й.т. жияни ҳамда 1974-1998 йиллар оралиғида туғилган 11 нафар маҳаллий фуқаролардан иборат ноқонуний гуруҳ ташкил этган. Улар билан жиҳодчилар оқими ғояларини қўллаб-қувватлаб келган.

Шунингдек, гуруҳ аъзоларини “ҳижрат” ва “жиҳод” қилишга, Сурия давлатига бориб, “Тавҳид ва Жиҳод катибаси”* террористик ташкилотига қўшилишга чорлаган.

Бундан ташқари, у телеграмда “Шаҳидлар” гуруҳини ташкил этиб, унга диний экстремистик оқимлар ва террористик ташкилотларнинг ғоявий раҳнамолари бўлмиш “Абу Салоҳ”, “Абдуллоҳ Зуфар”, “Содиқ Самарқандий” ва бошқаларнинг “ҳижрат”, “жиҳод” ва “шаҳидлик”ка чорловчи аудио-видео материалларини жойлаштириб, тарғибот ишлари олиб борган.

ДХХ Қашқадарё вилояти бошқармаси ва вилоят ички ишлар бошқармаси ходимлари ҳамкорлигида ўтказилган тезкор тадбир натижасида мазкур ноқонуний гуруҳ фаолиятига чек қўйилди.

Аниқланишича, гуруҳ етакчисининг кўрсатмаси билан унинг аъзолари босқинчилик жиноятларини содир этиш орқали йўл ҳаражатлари учун пул йиғиш, сўнгра Сурияга бориб, террористик ташкилотлар сафига қўшилишни режалаштирган.

Уларнинг яшаш манзилларидан компьютер процессори, ноутбук, дрон, флеш-карталар, ДВД дисклар, телефон аппаратлари, диний мазмундаги адабиётлар, шунингдек, бир донадан ўқотар ва пневматик қурол, патронлар ва гильзалар ашёвий далил сифатида процессуал тартибда расмийлаштириб олинди.

Таъкидланишича, гуруҳ аъзолари орасида МЧЖ раҳбари ва ишчиси, буюм бозорида сотувчилик билан шуғулланувчи шахслар ҳамда институт талабаси бор.

Жиноят Кодексининг тегишли моддасига асосан жиноят иши қўзғатилиб, тергов ҳаракатлари олиб борилмоқда.