Дания Гренландияга ҳарбий бўлинмаларни йўналтирмоқда

Дания Гренландияга ҳарбий хизматчиларни кўчиришни бошлади, ортидан НАТО иттифоқчилари томонидан қўшимча кучлар юборилиши кутилмоқда.

Бу ҳақда Euractiv портали маҳаллий ОАВларга таяниб хабар берди.

"Дания Қуролли кучларининг олдинги бўлинмаси (fortrop) аллақачон Гренландияга етиб келди. У эҳтимолий ҳолда йирикроқ бўлинмаларни жойлаштириш учун замин тайёрлайди», — дея маълум қилади портал DR телерадиокомпаниясига таяниб.

Гренландия ва Дания ҳокимиятлари оролда ҳарбий иштирокни кенгайтириш, шунингдек, 2026 йил давомида иттифоқчилар билан қўшма машқларни давом эттиришини эълон қилди.

"Гренландия аҳолиси янада кўпроқ ҳарбий самолётлар, қўшинлар ва кемаларни, жумладан НАТО иттифоқчиларига тегишлиларини ҳам кўришга тайёр бўлиши керак", — дейилади Гренландия ҳукумати сайтида эълон қилинган баёнотда, деб иқтибос келтиради портал.

Шунингдек, Швеция ҳам бугун оролга ҳарбий персоналнинг бир қисмини юборишини тасдиқлади. "Айнан Даниянинг илтимосига биноан Швеция Қуролли кучларидан персонал юборилмоқда", — деб ёзди Швеция бош вазири Ульф Кристерссон ижтимоий тармоқларда ва улар "бир нечта иттифоқчи давлатлардан ташкил топган кучлар гуруҳининг бир қисми" эканини қўшимча қилди.

Копенгагеннинг бу қадамлари Гренландия масаласида АҚШда гренландиялик, даниялик ва америкалик етакчилар ўртасида бўлиб ўтадиган ҳал қилувчи учрашув олдидан Вашингтон билан кескинлик кучайиб бораётган бир пайтда амалга оширилмоқда.

Аввалроқ, январь ойида АҚШ президенти Доналд Трамп Вашингтон Гренландия устидан назоратни барибир қўлга киритишини айтган эди. "Агар буни яхши йўл билан амалга ошириш мумкин бўлса — жуда яхши. Агар йўқ бўлса, унда биз бундан ҳам қатъийроқ усулни қўллаймиз", — деган у Оқ уйда журналистлар саволларига жавоб берар экан.