CNN: АҚШнинг Эронга қарши янги санкциялари самарасиз бўлиши мумкин

АҚШ президенти Дональд Трамп маъмурияти Эрон билан боғлиқ молиявий институтларга қарши янги санкциялар жорий қилди. Бироқ экспертлар ва дипломатлар ушбу чораларнинг қанчалик самарали бўлиши, шунингдек, Вашингтон Эроннинг асосий савдо ҳамкори бўлган Хитойга қарши кескин чоралар кўришга тайёрлиги борасида шубҳа билдирмоқда. Бу ҳақда CNN хабар берди.

Янги чекловлар Трамп маъмуриятининг Эронни иқтисодий жиҳатдан изоляция қилишга қаратилган стратегияси доирасида жорий этилмоқда. АҚШ Давлат котиби Марко Рубио бу ҳафта америкалик дипломатларга мезбон давлатларда Эрон билан мавжуд молиявий ва банк алоқаларини аниқлаш ҳамда уларни издан чиқариш вазифасини юклади.

Жума куни АҚШ Молия вазирлиги Туркиядаги молия муассасаси ва унинг шўба корхоналарига қарши санкциялар эълон қилди. Вашингтон мазкур ташкилотлар Эронга молиявий ёрдам етказишнинг муҳим каналлари бўлганини даъво қилмоқда. Шунингдек, Golden Bank ва унга алоқадор компаниялар ҳам санкциялар рўйхатига киритилди.

АҚШ Молия вазирлиги маълумотларига кўра, Golden Bank Ислом инқилоби қўриқчилари корпусининг «Қудс» кучларига йўналтирилган маблағлар билан боғлиқ ўнлаб миллион долларлик молиявий операцияларни амалга оширган.

Бироқ CNN суҳбатлашган экспертлар ва дипломатлар АҚШнинг Эроннинг энг йирик савдо ҳамкори бўлган Хитойга қарши кенг кўламли санкциялар жорий этишига шубҳа билан қарамоқда. Уларнинг фикрича, Пекинга қарши бундай чоралар Вашингтон учун жиддий иқтисодий ва дипломатик оқибатларга олиб келиши мумкин.

Покистон ва Уммон каби Эрон билан савдо алоқаларини сақлаб келаётган давлатларга нисбатан кескин чоралар кўрилиши ҳам савол остида қолмоқда. Бу мамлакатлар Эрон билан боғлиқ дипломатик саъй-ҳаракатларда ҳам иштирок этмоқда.

Айрим минтақавий экспертлар Эроннинг санкцияларга қарши кураш бўйича узоқ йиллик тажрибасига эътибор қаратмоқда. Уларнинг таъкидлашича, Теҳрон ўнлаб йиллар давомида турли чекловларни четлаб ўтиш механизмларини шакллантирган ва янги чоралар таъсирини камайтиришга уриниши мумкин.

АҚШ Молия вазири Скотт Бессент эса санкциялар самарасиз бўлиши мумкинлиги ҳақидаги фикрларни рад этиб, Вашингтон илгари ҳеч қачон бундай тезликда ҳаракат қилмаганини билдирди.

Шу билан бирга, экспертлар санкцияларнинг реал иқтисодий таъсири одатда дарҳол намоён бўлмаслигини таъкидламоқда. Шу сабабли Трамп маъмуриятининг Эронни иқтисодий жиҳатдан изоляция қилиш стратегияси қанчалик натижа бериши ҳозирча ноаниқ бўлиб қолмоқда.