Бельгия пойтахти Брюсселда ўн минглаб одамлар иқлим ўзгаришига қарши курашиш бўйича аниқ чоралар кўришни талаб қилиб юриш қилдилар. Норозилик намойиши БМТнинг CОР31 иқлим конференцияси арафасида бўлиб ўтди, деб хабар беради Euronews.
Юриш иштирокчилари шаҳар кўчалари бўйлаб юриш қилиб, Европа Иттифоқининг бош қароргоҳи томон йўл олишди. Улар расмийлардан глобал исишга қарши курашни кучайтиришни ва экологик муаммоларни сиёсий кун тартибига қўйишни талаб қилишди.
Полиция маълумотларига кўра, юришда 45 000 киши иштирок этган. Ташкилотчиларнинг айтишича, бу сон 60 000 га яқинлашган.
Митинг Climate Coalition ҳаракати томонидан бошқа жамоат ва сиёсий ташкилотлар билан ҳамкорликда ташкил этилди.
Юриш иштирокчилари бешта асосий талабни илгари суришди. Хусусан, қазилма ёқилғилар учун субсидияларни бекор қилиш, ушбу соҳага қўшимча солиқлар киритиш, яшил майдонларни кўпайтириш, атроф-муҳит ўзгаришига ижтимоий жиҳатдан адолатли ёндашувни таъминлаш, фуқаролар ва бизнесни қўллаб-қувватлаш ва халқаро иқлим ҳамкорлигини мустаҳкамлаш таклиф қилинди.
Фландрия ва Брюсселдаги “Яшилллар” партияси раиси Аймен Хорхнинг сўзларига кўра, Европадаги иссиқлик тўлқинлари ва ўрмон ёнғинлари иқлим ўзгариши кундалик ҳаётга бевосита таъсир қилаётганини кўрсатди.
— Одамлар иссиқдан ўлди. Уларнинг уйлари шунчалик қизиб кетдики, улар кечалари ухлай олмайдилар. Улар мамлакатдаги энг муҳим қўриқхоналардан бири бўлган Юқори Феннда ўрмон ёнғинларини кўришди. Аммо улар расмийларнинг тегишли чоралар кўрмаганига гувоҳ бўлишди, — деди у.
Аймен Хорх иқлим масаласи сиёсий кун тартибидан четлаштирилаётганидан хавотир билдирди.
Унинг сўзларига кўра, иқлим мақсадларини ҳимоя қилиш учун кураш Европа Парламентида ҳам, Бельгиянинг ўзида ҳам олиб борилиши керак бўлади. Чунки иссиқлик тўлқинлари ва иқлим ўзгаришининг одамлар ҳаётига таъсири ҳали ҳам долзарбдир.
Норозилик намойиши ноябрь ойида Туркиянинг Анталия шаҳрида бўлиб ўтадиган БМТнинг CОР31 иқлим конференцияси арафасида ташкил этилган.
Бироқ, мутахассисларнинг таъкидлашича, бўлажак учрашувдан сезиларли натижалар кутиш қийин. Бу АҚШнинг халқаро иқлим музокараларидан чиқиши ва Европада экологик сиёсатнинг секинлашиши билан боғлиқ.
Европа Иттифоқи ўзини иқлим соҳасидаги дунё етакчиларидан бири сифатида кўрсатаётган бўлса-да, яқинда бир қатор экологик талабларни юмшатишни бошлади.
Масалан, сентябрь ойида Европа Комиссияси метан чиқиндиларини тартибга солувчи қонуннинг кучга киришини 2027 йилдан 2028 йилга кечиктиришни таклиф қилди.
