БМТ минбарида БМТнинг ўзи танқид қилинди

Аргентина президенти БМТ минбаридан туриб ташкилотни кескин танқид қилди.

Аргентина президенти Хавьер Милей Нью-Йоркда БМТ Бош Ассамблеясининг умумий мажлисидаги нутқида ташкилотни кескин танқид қилди.

Милей БМТни самарасизликда айблаб, ташкилот «тартибсизлик, зўравонлик ва халқаро терроризм» тарқалишига йўл қўйганини билдирди.

Унинг сўзларига кўра, инсон ҳуқуқлари ва хавфсизлигини таъминлаш ўрнига, БМТ «қонхўр диктатуралар» ва «кўчаларда аёлларни тошбўрон қиладиган режимлар»ни ҳимоя қилган. Шунингдек, президент ташкилот атрофида одамлар ҳаёти ва суверен давлатлар сиёсатига аралашадиган улкан бюрократик тизим шаклланганини таъкидлади.

Милей БМТ фаолияти натижасини «анархия ва тиранлик аралашмаси» деб баҳолади.

Шундан сўнг Аргентина президенти сунъий интеллект мавзусига ўтди. Унинг таъкидлашича, сунъий интеллект меҳнат унумдорлигини кескин ошириши мумкин.

Милей Аргентинада сунъий интеллект соҳасини қатъий тартибга солишга қарши эканини яна бир бор билдириб, унинг ўрнига солиқ имтиёзлари ва сунъий интеллект агентлари билан ишлайдиган компаниялар учун чекланган жавобгарлик тизимини таклиф қилди.