Барселона ва Венеция туристларга қарши норозилик намойишлари бошланди

Испания ва Италиянинг бир қанча шаҳарларида сайёҳларнинг ҳаддан ташқари кўплигига қарши норозилик намойишлари бўлиб ўтди. Намойишчилар сайёҳлар сонини камайтиришни талаб қилмоқда, деб ёзади DW.

15 июнь куни Испания ва Италияда саёҳатчилар орасида машҳур бўлган шаҳарларда назоратсиз туризмга қарши намойишлар бўлиб ўтди. Reuters хабарига кўра, Барселонадаги митингда 600 га яқин одам “Сизнинг таътилингиз – мен учун қайғу” деган шиорлар ва “Оммавий туризм шаҳарни вайрон қилмоқда” ва “Уларнинг очкўзлиги бизни йўқ қилмоқда” деган ёзувларни кўтарган ҳолда қатнашган. Айрим фаоллар сув пуркагичларини отиб, дўкон ва меҳмонхона ойналарига “Туристлар, уйга қайтинглар!” деган стикер ёпиштиришди.

Маълумотларига кўра, 1,6 миллион аҳолига эга Барселона ўтган йили 26 миллион сайёҳни қабул қилган.

Венецияликлар янги меҳмонхоналарга қарши

Сайёҳлар келишини чеклашни талаб қилган норозилик намойишлари Жанубий Европанинг бошқа шаҳарларида ҳам бўлиб ўтди. Испанияда улар Малага, Пальма-де-Майорка, Сан-Себастьян, Гранада ва Ибица оролида; Италияда эса Генуя, Палермо, Неаполь, Милан ва Венеция шаҳарларида бўлиб ўтди. Венецияда намойишчилар 1500 сайёҳни сиғдира оладиган иккита янги меҳмонхона қурилишига қарши чиқди.

Reuters агентлигининг прогнозларига кўра, Европада халқаро саёҳатларга сарфланадиган харажатлар 2025 йилда 11 фоизга ўсиб, 838 миллиард долларга (727 миллиард евро) етиши мумкин. Франция ва Испанияга сайёҳлар келиши рекорд даражага етиши мумкинлиги тахмин қилинмоқда.