АҚШ Эронга қарши янги санкциялар жорий этди

Чекловлар Мужтабо Хоманай атрофидагилар билан боғлиқ компаниялар ва валюта айирбошлаш шохобчаларига нисбатан қўлланилди.

АҚШ Молия вазирлиги Ормуз бўғозида учта тижорат кемасига уюштирилган ҳужумлардан кейин кескинлашган вазият фонида Эронга қарши янги санкциялар пакетини эълон қилди.

АҚШ Молия вазирлигининг Хорижий активларни назорат қилиш бошқармаси (OFAC) маълум қилишича, санкциялар АҚШ томони Эрон олий раҳбари Мужтабо Хоманай ҳамда Эрон Ислом инқилоби қўриқчилари корпуси (ИИҚК) билан алоқадор деб ҳисоблайдиган Али Ансорийга нисбатан жорий этилган.

Шунингдек, Теҳрон ва Шероз шаҳарларида фаолият юритувчи бир нечта «яширин» валюта айирбошлаш шохобчалари ҳам санкциялар рўйхатига киритилди.

Вашингтон маълумотларига кўра, Эронда рўйхатдан ўтган Mohammad Darbani and Partners Exchange, Mohsen Khandan and Partners Exchange ва Lavasani and Partners Exchange компаниялари ҳам махсус белгиланган шахслар ва ташкилотлар рўйхатига қўшилган.

Бундан ташқари, санкциялар Сент-Китс ва Невис давлатида рўйхатдан ўтган Smart Global Limited холдинг компаниясига ҳам татбиқ этилди. АҚШ Молия вазирлиги ушбу компания Али Ансорий билан боғлиқ эканини таъкидламоқда.