АҚШ 2027 йилда ЮНЕСКОдан чиқишини эълон қилди

АҚШ 2027 йилдан бошлаб БМТнинг таълим, фан ва маданият масалалари бўйича агентлиги — ЮНЕСКО таркибидан чиқишини расман маълум қилди.

Reportнинг хабар беришича, бу ҳақда АҚШ Давлат департаменти баёнот берди. Ҳужжатда айтилишича, АҚШ 2026 йил 31 декабрда ташкилотни расман тарк этади.

Давлат департаменти маълум қилишича, АҚШ бу қарор ҳақида ЮНЕСКО раҳбариятини олдиндан хабардор қилган.

"ЮНЕСКО ижтимоий ва маданий муаммоларни ҳал этишда жамиятда бўлинишлар келтириб чиқаради, БМТнинг Барқарор ривожланиш мақсадлари ва глобал тараққиёт йўлидаги идеологик кун тартибига ортиқча эътибор қаратади. Бу эса бизнинг 'Америка биринчи ўринда' сиёсатимизга зид келади. Шунингдек, ташкилот ичида Исроилга қарши нотўғри риторика мавжуд", — дейилади баёнотда.

Аввалроқ, АҚШ президенти Дональд Трамп мамлакатни ЮНЕСКОдан чиқариш бўйича қарор қабул қилгани ҳақида хабар берилган эди.