Афғонистонда ўзбек тилига чеклов йўқ

Афғонистонда ўзбек тилининг қўлланилишига чекловлар жорий этилгани ҳақида тарқалаётган хабарлар ҳақиқатга тўғри келмайди.

Ўзбекистон Ташқи ишлар вазирлиги Афғонистон ТИВ билан боғланиб, масалага ойдинлик киритди. Афғонистон расмийлари мамлакат ҳудудида ўзбек тилидан фойдаланишга ҳеч қандай тақиқ йўқлигини маълум қилди.

Қайд этилишича, таълим муассасалари пештоқларидаги ёзувлар мамлакат бўйлаб ягона стандарт асосида пушту, дарий ва инглиз тилларида берилади. Шу билан бирга, шимолий ҳудудларда, жумладан Саманган университетида ёзувлар пушту, дарий ва ўзбек тилларида акс эттирилади.
Шунингдек, жорий йилдан бошлаб Жоузжон давлат университетида магистратура босқичида “Ўзбек тили ва адабиёти” йўналишини очиш режалаштирилган.