2018 йилда Макрон Дуровга Telegram штаб-квартирасини Парижга кўчиришни таклиф қилган эди

Бир йил аввал Франция ва БАА разведка хизматлари тадбиркорнинг телефонини бузиб киришган — The Wall Street Journal.

WSJ нашрининг ёзишича, 2018 йилда Павел Дуров Франция президенти билан тушлик қилган. Макрон Дуровга нафақат Telegram офисини Парижга кўчиришни таклиф қилган, балки унга Франция фуқаролигини бериш имкониятини ҳам муҳокама қилган, лекин Дуров рад жавобини берган. (Дуров Франция фуқаролигини 2021 йилда жуда кам қўлланиладиган тартиб орқали олган)

Нашрнинг қайд этишича, ушбу учрашувдан бир йил олдин, Франция ва Бирлашган Араб Амирликлари разведка хизматлари қўшма операция давомида Дуровнинг телефонидаги маълумотларни олишга урунишган. Нашрнинг ёзишича, разведка хизматлари "Исломий давлат" Telegram орқали жангариларни ёллаш ва терактлар режалаштираётганидан ниҳоятда хавотирда эди.