Xitoy AQShni yirik kiberhujumda aybladi

Xitoy AQShni mamlakatning Milliy vaqt xizmati markazi (NTSC)ga kiberhujum uyushtirganlikda ayblab, bu aloqa, moliyaviy va transport tizimlari hamda elektr ta’minotini buzishi mumkinligini da’vo qildi. Bu haqda 19 oktyabr, yakshanba kuni Xitoy Davlat xavfsizlik vazirligi o‘zining WeChat akkauntida ma’lum qildi, deya xabar beradi Reuters agentligi.

Pekin AQSh Milliy xavfsizlik agentligi (MXA) «uzoq vaqtdan beri» shunga o‘xshash hujumlarni amalga oshirib kelayotganini da’vo qilmoqda. Agentlikning ta’kidlashicha, u kamida 2022 yilga oid akkauntlarni buzish va o‘g‘irlashni ko‘rsatuvchi dalillarni aniqlagan. Xitoy idorasiga ko‘ra, bu ma’lumotlar xodimlarning mobil qurilmalari va markazning tarmoq tizimlarini kuzatish uchun ishlatilgan.

Xitoy maxsus xizmati ma’lumotlariga ko‘ra, AQSh razvedkasi 2022 yilda ishchi qurilmalariga kirish uchun xorijiy smartfon brendining xabar almashish tizimidagi «zaiflikdan foydalangan». Xitoyning ta’kidlashicha, 2023 va 2024 yillarda AQSh markazning ichki tarmoq tizimlariga ham hujumlar uyushtirgan va yerga asoslangan yuqori aniqlikdagi vaqtni o‘lchash tizimini buzishga uringan. Vashington hozircha bu ayblovlarga izoh bermagan.