Xitoy aholisining 21,1 foizini 60 yoshdan oshganlar tashkil qiladi

Rasmiy hisobotga ko‘ra, Xitoyning 60 va undan katta yoshdagi aholisi 2023 yilda qariyb 297 million kishiga yetdi, bu mamlakat umumiy aholisining 21,1 foizini tashkil qiladi. Bu haqda Sinxua xabar bermoqda .

Fuqarolik ishlari vazirligi va Xitoyning qarish bo‘yicha milliy qo‘mitasi tomonidan birgalikda e’lon qilingan hisobotda 65 va undan katta yoshdagilar soni 216,76 millionga yetgan, bu umumiy aholining 15,4 foizini tashkil etgani aytiladi.

Hisobotda ta’kidlanishicha, Xitoyda pensiya sug‘urtasi qamrovi kengayishda davom etmoqda. 2023 yil oxiriga kelib, mamlakat bo‘ylab bazaviy pensiya sug‘urtasida qatnashuvchilar soni o‘tgan yil oxiriga nisbatan 13,36 million kishiga ko‘payib, 1,066 milliard kishiga yetdi.

Xitoy shaharlardagi turar-joy jamoalarini rivojlantirmoqda va keksalar uchun uyda parvarishlash xizmatlarini kengaytirmoqda. 2023 yil oxiriga kelib, 150 ta pilot hududda 3476 ta qulay turar-joylar barpo etildi, ular qariyb 64,55 million nafar keksalarga xizmat ko‘rsatadi.

2023 yil oxiriga kelib, Xitoyda 7881 ta keng qamrovli tibbiy va qariyalarni parvarish qilish muassasalari mavjud edi.