Xalqaro kosmik stansiyada vaqtincha 11 nafar kosmonavt yashamoqda

SpaceX kompaniyasining Dragon kosmik kemasi Crew-13 xalqaro ekipajini Xalqaro kosmik stansiyaga (XKS) yetkazdi. Parvoz 7 soat 55 daqiqa davom etdi. Bu Amerika kosmik kemasining stansiyaga amalga oshirgan eng tez parvozi bo‘ldi.

Yangi ekipaj tarkibida amerikalik astronavtlar Jessika Uotkins va Lyuk Delani, kanadalik Joshua Katrik hamda rossiyalik kosmonavt Sergey Teteryatnikov bor.

Ularning yetib kelishi bilan XKSda vaqtincha 11 nafar kishi bo‘ldi.

Stansiyada jami oltita doimiy yotoq kabinasi va ikkita hojatxona mavjud. Shu sababli ekipajlar qisqa muddat birgalikda ishlaydigan davrda qo‘shimcha uxlash joylari tashkil etiladi.

Biroq XKS uchun 11 nafarlik ekipaj rekord emas. Stansiyada uch marta bir vaqtning o‘zida 13 nafar kishi bo‘lgan. Birinchi marta bunday holat 2009 yilda qayd etilgan.

5 oktyabr kuni, agar ob-havo sharoiti qulay bo‘lsa, avvalgi Crew-12 ekipajining Yerga qaytishi kutilmoqda. Yangi ekipaj esa XKSda taxminan olti oy qoladi.

Shu vaqt davomida astronavtlar vaznsizlik sharoitida qon aylanishi va tromblar paydo bo‘lish xavfini, Parkinson kasalligini hamda laboratoriyada yetishtirilgan yurak to‘qimalarini tadqiq qiladi.

Shuningdek, ular kelajakda Oyga parvozlar uchun zarur texnologiyalarni tayyorlash doirasida kosmik kemani qo‘lda qo‘ndirish bo‘yicha mashg‘ulotlar o‘tkazadi.