“Umumiy harbiy majburiyat va harbiy xizmat to‘g‘risida”gi O‘zbekiston Respublikasining Qonuniga o‘zgartish va qo‘shimchalar kiritilishi kutilmoqda. Bu haqdagi qonun loyihasi Normativ-huquqiy hujjatlar loyihalari muhokamasi portaliga joylashtirildi.
Unga ko‘ra, O‘zbekiston Respublikasining 2002 yil 12 dekabrda qabul qilingan “Umumiy harbiy majburiyat va harbiy xizmat to‘g‘risida”gi 436–II-sonli Qonuniga (O‘zbekiston Respublikasi Oliy Majlisining Axborotnomasi, 2002 yil, № 12, 217-modda; 2003 yil, № 9-10, 149-modda; 2005 yil, № 1, 18-modda; O‘zbekiston Respublikasi Oliy Majlisi palatalarining Axborotnomasi, 2006 yil, № 6, 262-modda; 2008 yil, № 9, 481-modda, № 12, 630-modda; 2009 yil, № 12, 470-modda; 2016 yil, № 9, 276-modda; 2017 yil, № 6, 300-modda; 2018 yil, № __, __-modda) quyidagi o‘zgartishlar kiritiladi.
1) 5-modda ikkinchi qismining:
ikkinchi xatboshisidagi “(oliy ma’lumotli shaxslar uchun - to‘qqiz oy)” degan so‘zlar chiqarib tashlanadi;
uchinchi xatboshisidagi “to‘qqiz” degan so‘z “o‘n ikki”degan so‘zlar bilan almashtiriladi;
2) 18-moddaning uchinchi qismidagi “aprel” degan so‘z “may” degan so‘z bilan almashtiriladi;
3) 19-moddaning birinchi qismidagi “fevral-mart” degan so‘zlar “mart-aprel” degan so‘zlar bilan almashtiriladi;
4) 20-moddaning beshinchi qismi:
quyidagi mazmundagi sakkizinchi xatboshi bilan to‘ldiriladi:
“yigirma yetti yoshga to‘lganligi sababli Qurolli Kuchlar zahirasiga o‘tkazish to‘g‘risida;”;
sakkizinchi xatboshisi to‘qqizinchi xatboshi deb hisoblanadi;
5) 21-modda:
quyidagi mazmundagi to‘rtinchi qism bilan to‘ldiriladi:
“Oliy ta’lim muassasalarida kunduzgi o‘qishda tahsil olayotgan talabalar o‘z roziliklari bilan safarbarlik chaqiruvi rezervi xizmatiga olinishlari mumkin. Bunda talabalar oylik harbiy yig‘inlarni o‘tashga yilning iyul-avgust oylarida jalb etiladilar.”;
to‘rtinchi–oltinchi qismlar tegishincha beshinchi–ettinchi qismlar deb hisoblanadi.
2-modda. O‘zbekiston Respublikasi Mudofaa vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda aholi o‘rtasida mohiyati va ahamiyati tushuntirilishini ta’minlaydi.
3-modda. O‘zbekiston Respublikasi Vazirlar Mahkamasi:
hukumat qarorlarini ushbu Qonunga muvofiqlashtiradi;
davlat boshqaruvi organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlaydi.
4-modda. Ushbu Qonun rasmiy e’lon qilingan kundan e’tiboran kuchga kiradi.
