Ukraina “Flamingo” raketalari bilan Cheboksarga zarba berdi

Ukraina “Flamingo” raketalari bilan Cheboksarga zarba berdi, raketalar chegaradan 1000 kilometr masofadagi nishonlarga yetib bordi.

Ukraina 10 iyunga o‘tar kechasi dron va raketalar orqali Rossiyadagi nishonlar bo‘ylab zarbalar yo‘lladi. Rossiya mudofaa vazirligiga ko‘ra, mamlakatning 19 ta regioni va anneksiya qilingan Qrim hududida dronlar urib tushirilgan. Ural federal okrugining barcha oltita regionida va urush boshidan buyon ilk marta Omsk viloyatida ham havo hujumidan ogohlantiruvchi sirenalar yangragan.

Cheboksarga raketa hujumi amalga oshirildi, deb xabar berdi Chuvashiya rahbari Oleg Nikolayev. Uning so‘zlariga ko‘ra, uch kishi yaralangan – shundan ikkitasining ahvoli o‘rta darajadagi og‘irlikda, uchinchisining jarohati yengil. Astra telegram-kanali zarba berilgan joyda olingan foto va videolarni o‘rgangan holda hujum nishoni “VNIIR-Progress” korxonasi bo‘lganini ma’lum qilgan. Bu zavodda dronlar, shuningdek, qanotli va ballistik raketalar uchun “Kometa” navigasiya modullari ishlab chiqariladi. Ushbu korxona oldin ham hujumga uchragan – bu yerga 2025 yil noyabrida va 2026 yil may oyi boshida zarba berilgandi.

Sevastopolda ukrain dronlari “Sevastopol mudofaasi 1854–1855 yillar” panoramasi binosiga zarar yetkazdi, deya xabar berdi shaharning Rossiya tomonidan tayinlangan gubernatori Mixail Razvojayev.

Xabar berilishicha, “operativ vaziyat” tufayli shaharda Sevastopolning 243 yilligiga bag‘ishlangan bayram tadbiri bekor qilingan. Uni 14 iyun kuni Malaxov qo‘rg‘onida o‘tkazish rejalashtirilgan edi.

Volodimir Zelenskiy o‘z chiqishida Ukraina Rossiya harbiy ob’ektlari va neft sanoatiga qarshi “uzoq masofali sanksiyalarni qo‘llash”da davom etayotganini aytdi. Uning so‘zlariga ko‘ra, Cheboksarga Ukrainaning FP-5 “Flamingo” rusumli raketalari uchib borgan. Cheboksardan Ukraina chegarasigacha bo‘lgan masofa kamida 1000 kilometrni tashkil etadi.

Samara oblastidagi Kuybishev neftni qayta ishlash zavodi hamda Vladimir oblastidagi ikkita neft infratuzilma ob’ektiga aniq zarba berilgan, deya qo‘shimcha qildi Zelenskiy.

Rossiya mudofaa vazirligi xabarida keltirilishicha, kun davomida havo hujumidan mudofaa kuchlari “Flamingo” rusumli to‘rtta qanotli raketa hamda 766 ta dronni urib tushirgan.