Turkiyada bo‘lib turgan O‘zbekiston fuqarolari ogohlantirildi

Turkiya Respublikasida COVID-19 tarqalishiga qarshi kurashish doirasida karantin choralari kuchaytirilib, yangi cheklovlar joriy etilmoqda.

Mamlakatimizning Turkiyadagi elchixonasi ma’lum qilishicha, 2020 yil 1 dekabr soat 21:00 dan pandemiya bilan bog‘liq quyidagi yangi cheklovlar kuchga kiradi:

• ish kunlari soat 21:00 dan 5:00 ga qadar komendantlik soati belgilandi;
• dam olish kunlari juma kuni kechqurun soat 21:00 dan dushanba kuni ertalab soat 5:00 ga qadar ko‘chaga chiqish mumkin emas;
• janoza va to‘y marosimlarida qatnashchilar soni 30 kishidan oshmasligi kerak;
• barcha davlat muassasalari ish kunlari soat 10:00 dan 16:00 gacha bo‘lgan vaqtda faoliyat ko‘rsatadi;
• 65 yoshdan oshgan va 20 yoshdan kichik fuqarolar jamoat transportidan foydalana olmaydilar;
• mehmonlarni qabul qilish, mavludlar, kechalar o‘tkazish, bayramlarni, jumladan yangi yilni nishonlash taqiqlandi;
• kinoteatrlar yil oxirigacha yopiq bo‘ladi. Shuningdek, sauna, hammom va lunaparklar ham yopiladi;
• o‘yin va sport maydonchalaridan foydalanish taqiqlanadi. Mamlakatdagi barcha sport tadbirlarini hozirgi vaqtdagidek tomoshabinlarsiz o‘tkazishda davom etiladi;
• savdo markazlariga faqat maxsus kod (HES) bilangina kirish mumkin bo‘ladi. Maxsus kod Turkiya Sog‘liqni saqlash vazirligining elektron ilovasi orqali olinadi;
• barcha bolalar bog‘chalari, tayyorlov sinflari va boshqa bolalar ta’lim muassasalari faoliyati to‘xtatiladi. Maktab o‘quvchilari va talabalar uchun masofaviy o‘qitish 2020 yil oxirigacha uzaytirilmoqda;
• shifoxonalar, o‘t o‘chirish xizmatlari, polisiya va dorixonalar har kuni hech qanday cheklovlarsiz ishlaydi;
• komendantlik soati vaqtida faqat uyga yetkazib berish xizmati bilan shug‘ullanuvchi do‘konlar, kafe va restoranlar ham ishlashni davom ettiradi;
• agar biror kishida samolyot yoki poyezd chiptasi bo‘lsa, u aeroport yoki temir yo‘l stansiyasigacha yetib olish uchun shaxsiy yoki jamoat transportidan foydalanishi mumkin;
• jamoat transportidan foydalanish, savdo markazi, kasalxona, davlat idoralariga kirish uchun HES kodi talab qilinadi. Bu Turkiya fuqarolariga ham, mazkur mamlakatda yashash huquqiga (ikamet) ega bo‘lganlarga ham tegishli;
•  muntazam ravishda yuz niqobini taqib yurish tartibi, ijtimoiy masofani saqlash va virusga qarshi gigiyenik qoidalarga amal qilish, shuningdek, ko‘chada sigaret chekishga qo‘yilgan taqiq o‘z kuchida qolmoqda.