Tramp: «Si Jinping bilan kelishuv qilish juda qiyin»

AQSh va Xitoy savdo bo‘yicha kelishuviga erisholmasligi mumkin. Donald Tramp Si Jinpingni «juda qattiq» va kelishuvga borishi qiyin yetakchi deb atadi. Bu ayniqsa kamyob metalllar eksportidagi bahslar fonida sodir bo‘lmoqda.

AQSh prezidenti Donald Tramp Xitoy rahbari Si Jinpingni «juda qattiq va kelishuvga kelish qiyin» inson sifatida tavsifladi. Bu bayonotlar ikki davlat o‘rtasidagi Jenevada imzolangan savdo kelishuvi bajarilishiga oid bahslar kuchaygan bir paytga to‘g‘ri kelmoqda.

Tramp Truth Social ijtimoiy tarmog‘ida: «Men Si Jinpingni yoqtiraman, lekin u juda qattiq va kelishuv qilish juda qiyin!!!» — deb yozdi. Ushbu fikrlar Tramp va Si o‘rtasidagi so‘nggi muloqotga javob ekani hozircha aniq emas.

O‘tgan hafta Vashington Pekinni Jeneva kelishuvidagi majburiyatlarini bajarmayotganlikda aybladi. Xususan, Xitoyning kamyob metalllar eksporti bo‘yicha lisenziyalar berishdagi sustligi AQSh sanoatida uzilishlarga olib kelayotgani qayd etildi.

Bunga javoban, Xitoy tashqi ishlar vaziri Vang I AQShning Pekinga qarshi «asossiz cheklovlari» Jenevadagi kelishuvga zid ekanini ta’kidladi. U AQShning Huawei chiplariga bo‘lgan nazoratni kuchaytirishi, chip loyihalashtirish dasturlarini Xitoy kompaniyalariga sotishni to‘xtatishi va xitoylik talabalar vizalarini bekor qilishi kelishuvga qarshi harakatlar deb baholadi.

Jenevadagi kelishuvdan so‘ng ikki davlat 90 kun davomida o‘zaro tariflarni kamaytirishga rozi bo‘lgan edi: AQShning Xitoy tovarlariga tariflari 30 foizga, Xitoyning AQShga nisbatan tariflari esa 10 foizga tushirilgan.

Shu bilan birga, Xitoy AQShga nisbatan no-tarif choralarini bekor qilish yoki to‘xtatishga rozi bo‘lgan, biroq bu borada aniq tafsilotlar taqdim etilmagan. AQSh tomoni esa kamyob metalllar eksporti bo‘yicha cheklovlar bekor qilinishini kutgan, ammo Pekin bu jarayonni sekinlashtirgani Vashingtondagi xavotirni kuchaytirmoqda.