Tramp: AQSh va Turkiya munosabatlari tarixdagi eng yaxshi bosqichda

Turkiya prezidenti Rajab Toyyib Erdog‘an va AQSh prezidenti Donald Tramp qo‘shma matbuot anjumanida ikki davlat munosabatlari va mudofaa sohasidagi hamkorlik masalalari yuzasidan bayonot berdi.

Prezident Erdog‘anning aytishicha, amaldagi sammit doirasida Turkiyaning AQShning beshinchi avlod F-35 qiruvchi samolyotlari dasturiga qayta qo‘shilishi bo‘yicha ijobiy qaror qabul qilinishiga ishonch yuqori. Uning ta’kidlashicha, bu masala avval ham AQSh tomoni bilan muhokama qilingan va Anqara dastlabki beshta samolyotni yetkazib berish bo‘yicha va’da olgan.

Turkiya rahbari Donald Trampning Anqaraga tashrifini yuqori baholab, AQSh prezidentining Turkiya poytaxtida bo‘lishi ikki davlat munosabatlarini yanada mustahkamlashini ta’kidladi. Erdog‘anning so‘zlariga ko‘ra, Tramp har doim o‘z so‘zida turadi va u sammit muzokaralari ijobiy yakunlanishiga umid qilmoqda.

Uchrashuvda mudofaa sohasidan tashqari mintaqaviy va xalqaro kun tartibidagi muhim masalalar ham muhokama qilindi. Erdog‘an Turkiya Eron va AQSh o‘rtasidagi munosabatlarni barqarorlashtirish orqali global tinchlikni mustahkamlashga hissa qo‘shishga intilayotganini bildirdi. Shuningdek, Rossiya—Ukraina mojarosini hal etish bo‘yicha sa’y-harakatlarni muvofiqlashtirish va NATOning ikki muhim davlati o‘rtasidagi hamjihatlikni kuchaytirish masalalari ham ko‘rib chiqildi.

Muzokaralarda harbiy-texnik hamkorlikka ham alohida e’tibor qaratildi. Turkiya tashqi ishlar vaziri Haqan Fidan va boshqa rasmiylar milliy KAAN qiruvchi samolyoti uchun dvigatellar yetkazib berish masalasini muhokama qilishga tayyorgarlik ko‘radi.

Donald Tramp Turkiyaning harbiy salohiyatini yuqori baholab, Erdog‘an rahbarligida mamlakat harbiy jihatdan juda kuchayganini va butun dunyoda hurmat qozonganini ta’kidladi. Shuningdek, u agar uchrashuv do‘sti Erdog‘an rahbarlik qilayotgan Turkiyada o‘tmaganida, ehtimol unda ishtirok etmagan bo‘lishini aytdi.

Tramp Vashington va Anqara o‘rtasidagi munosabatlarni «tarixdagi eng yaxshi bosqich» deb atadi. Jurnalistlarning Turkiya mudofaa sanoatiga nisbatan joriy etilgan CAATSA sanksiyalari haqidagi savoliga javoban AQSh prezidenti Vashington mazkur cheklovlarni bekor qilish imkoniyatini ko‘rib chiqishi mumkinligini bildirdi.