Tataristonda veyp sotish taqiqlandi

Tatariston Davlat kengashining Iqtisodiyot, investisiyalar va tadbirkorlik qo‘mitasi respublika hududida veyplar va ular uchun mo‘ljallangan suyuqliklarni chakana sotishni besh yilga taqiqlash to‘g‘risidagi qonun loyihasini ma’qulladi.

Hujjat respublika hududida nikotin yetkazib beruvchi elektron tizimlarni chakana sotishni taqiqlashni nazarda tutadi. Cheklov besh yil muddatga, ya’ni 2027 yil 1 martdan 2032 yil 1 martgacha joriy etiladi.

Mazkur qaror tibbiyot mutaxassislarining veyplarning yoshlar salomatligiga zarari haqidagi fikrlari inobatga olingan holda qabul qilindi.

Tadqiqot natijalariga ko‘ra, 18 yoshdan oshgan rossiyaliklarning 62 foizi tamaki chekib ko‘rgan. Ular orasida nikotin saqlovchi muqobil mahsulotlardan foydalanib ko‘rganlar ham bor.

So‘rovda qatnashganlarning 31 foizi tamaki va nikotin saqlovchi mahsulotlarni iste’mol qiladi. Veypdan foydalanuvchilarning ulushi 9 foizni tashkil etadi. Bu ko‘rsatkich yirik shaharlar aholisi va 35 yoshgacha bo‘lgan fuqarolar orasida yuqoriroq. Voyaga yetgan rossiyaliklarning 21 foizi veyp ishlatib ko‘rgan.

Hududiy cheklovlarni joriy etish uchun Rossiya prezidenti imzolagan federal qonun huquqiy asos bo‘ldi. U 2026 yil 1 oktyabrda kuchga kirib, Rossiya Federasiyasi sub’ektlariga veyplarni chakana sotishni taqiqlash huquqini berdi.

Shunga o‘xshash taqiq Perm o‘lkasida ham joriy etildi. Sentyabr oyining oxirida Udmurtiya ham xuddi shunday qaror qabul qildi. U yerda ham cheklovlar 2027 yil 1 martdan kuchga kirishi kerak.

Rossiya hukumati huzuridagi ijtimoiy ta’minot masalalari bo‘yicha kengashning «Sog‘liqni saqlash va sog‘lom turmush tarzi» seksiyasi ishtirokchilari nikotin saqlovchi mahsulotlarning ayrim turlari va tamakining muqobil mahsulotlarini sotishga avlodlar bo‘yicha taqiq joriy etish imkoniyatini ko‘rib chiqishni taklif qilgan edi.