Tanzila Narbayeva Fatma Aksal boshchiligidagi delegasiya bilan uchrashdi

2022 yil 7 fevral kuni Oliy Majlis Senati Raisi, Gender tenglikni ta’minlash masalalari bo‘yicha komissiyasi raisi Tanzila Narbayeva mamlakatimizga tashrif buyurgan Turkiya Respublikasi Buyuk millat majlisi Imkoniyatlarda gender tenglik komissiyasi raisi Fatma Aksal boshchiligidagi delegasiya bilan uchrashdi.

Senat Raisi T. Narbayeva davlatimizda amalga oshirilgan tub siyosiy va ijtimoiy-iqtisodiy islohotlar, shuningdek gender tenglikni ta’minlash borasida amalga oshirilgan ishlarga to‘xtalib, so‘nggi yillarda O‘zbekiston va Turkiya o‘rtasida barcha sohalarda, shu jumladan, parlamentlar o‘rtasida hamkorlik yangi bosqichga ko‘tarilganini ta’kidladi.

Uchrashuvda ikki mamlakat o‘rtasida parlamentlararo hamkorlik holati va istiqbollari muhokama qilindi hamda gender tenglikni ta’minlash va xotin-qizlar manfaatlarini himoya qilish masalalari yuzasidan fikr almashildi.

F. Aksal mamlakatimiz katta yutuqlarga erishayotganini, davlatlarimiz o‘rtasidagi qardoshlik rishtalari yanada mustahkamlanib borayotganini ta’kidlab, bugun O‘zbekiston va Turkiya ishonchli strategik hamkor mamlakatlar hisoblanishini qayd etdi.

Mamlakatimizda xotin-qizlar masalalariga e’tibor kuchaygani, ayollar va erkaklar uchun teng imkoniyatlar yaratilayotgani, mehnat va turmush sharoitlarini yaxshilash, xotin-qizlarga nisbatan zo‘rovonlik holatlarini bartaraf etish, imkoniyati cheklangan shaxslarni qo‘llab-quvvatlash bo‘yicha amaliy ishlar olib borilgani hamda 2021 yilda Markaziy Osiyo mamlakatlari yetakchi ayollari muloqotiga O‘zbekiston raislik qilgani alohida ta’kidlandi.

Uchrashuvda savdo-iqtisodiy, investisiyaviy va boshqa sohalardagi ikki tomonlama hamkorlikni mustahkamlash, ikki mamlakat uchun har jabhalarda ustuvor bo‘lgan yo‘nalishlarda, jumladan xotin-qizlarning iqtisodiy imkoniyatlarini ro‘yobga chiqarish borasida hamkorlik o‘rnatish, mamlakatlar hududlari o‘rtasida to‘g‘ridan-to‘g‘ri aloqalarni yo‘lga qo‘yish maqsadida qo‘shma loyiha va dasturlarni amalga oshirish orqali samarali hamkorlikni kengaytirishga kelishib olindi.

Shuningdek, uchrashuvda o‘zaro qiziqish uyg‘otgan boshqa masalalar ham muhokama qilindi.