Suriyada ISHIDga qarshi operasiya boshlandi

Suriyaning o‘tish davri hukumati xavfsizlik kuchlari Palmirada Suriya va Amerika qo‘shma patruliga qilingan hujumga javoban Xoms viloyati va Suriya cho‘lining bir qancha hududlarida ISHID terrorchilik guruhiga qarshi operasiya boshladi.

Bu haqda Al-Ixbariya telekanali xabar berdi.

Xavfsizlik matbuot kotibi Ali al-Sufining aytishicha, operasiya Arab Respublikasining sharqiy va janubi-sharqiy qismlarida Suriya sahrosida yashiringan ISHIDga aloqador jangarilarga qarshi qaratilgan.

Suriya telekanali xabariga ko‘ra, AQSh boshchiligidagi koalisiya Palmira va uning atrofidagi otishma ortidan hibsga olish kampaniyasini olib bormoqda.

Shanba kuni qurolli shaxs qo‘shma suriyalik-amerikalik patrulga qarata o‘t ochdi, natijada ikki amerikalik harbiy va bir amerikalik fuqaro tarjimoni halok bo‘ldi. Ularning jasadlari AQSh vertolyotlari orqali al-Tanf chegarasidagi (Damashqdan 250 km uzoqlikda) G‘arb koalisiyasining harbiy bazasiga yetkazilgan. Suriya Ichki ishlar vazirligi vakilining so‘zlariga ko‘ra, hujum qilgan shaxs xavfsizlik kuchlari a’zosi bo‘lgan, ammo qo‘mondonlik lavozimini egallamagan. Otishma paytida u zararsizlantirildi. Rasmiylar uning ISHIDga aloqadorligi yoki shunchaki terrorchilar mafkurasiga amal qilganligini tekshirmoqda.