AQSh davlat departamenti Saudiya Arabistoni va BAAning milliardlab dollarlik mudofaa shartnomalari uchun uchun «yashil chiroq»ni yoqdi. Bu haqda AQSh mudofaa vazirligining harbiy hamkorlik boshqarmasi bayonot berdi.
Xususan:
- AH-64A/D/E Apache vertolyotlarida qo‘llaniladigan, tanklarga qarshi yarimfaol kallakli o‘zitopar raketalar (AGM-114R3 Hellfire II)dan 2 503 tasini Saudiya Arabistoni sotib oladi. Ushbu shartnoma qiymati — 655 mln dollar, ijrochi — Lockheed Martin kompaniyasi.
- F-15 qiruvchi samolyotlari uchun mo‘ljallangan 220 ta aviasiya raketasi (AIM-9X Block 3)ni ham saudiyaliklar sotib olmoqda. Bu shartnoma qiymati — 251 mln dollar, buyurtmani Raytheon kompaniyasi bajaradi.
- Shuningdek, Saudiya Arabistoni AQShdan M60A3 tanklarida qo‘llaniluvchi 105 mm kumulyativ tank snaryadlari va boshqa xildagi o‘q-dorilarni sotib oladi. Bu savdoning umumiy qiymati — 139 mln dollar.
- Birlashgan Arab Amirliklari esa ATACMS raketalari, GMLRS snaryadlari va ular bilan bog‘liq tizimlarni 1,2 mlrd dollarga xarid qilmoqda.
